请选择 进入手机版 | 继续访问电脑版
设为首页收藏本站

 找回密码
 立即注册

QQ登录

只需一步,快速开始

搜索
热搜: 活动 交友 discuz
查看: 133|回复: 0

小辰光个一顿年夜饭

[复制链接]

8877

主题

20

回帖

3万

积分

管理员

积分
31181
发表于 2024-2-7 15:04:03 | 显示全部楼层 |阅读模式
2024-02-04  新民晚报网 作者:文/朱少伟



      每趟去逛闹猛个上海老城隍庙,走过门庭若市个南翔馒头店,我就会回想起小辰光个一顿年夜饭。

      埃歇辰光正是三年困难时期,因为爷娘侪勒解放军部队工作,刚刚六岁个我搭仔老阿奶住勒上海南市。老阿奶是个热心肠,经常帮隔壁邻居照顾小囡,所以弄堂里向个小八腊子侪跟伊来得亲热。

      勒一个小年夜前头,我看见老阿奶坐辣海闷声勿响,就问伊:“侬勒想啥事体呀?”“弄堂口阿大、阿二个爷娘回乡下去处理急事体了;斜对面小妹一直跟外婆过日脚,现在外婆住进医院了;弄堂笃底大宝、二宝个爷娘厂里向忙,最近要天天加班;还有琴琴、英英咾啥……”老阿奶皱仔眉头讲,“迭眼小囡搿趟恐怕侪吃勿着年夜饭了!”

      听了老阿奶迭番闲话,我也开始为伊拉担心。老阿奶突然立起来,走到灶披间里向,寻出平常勿舍得吃个两斤线粉、一包霉干菜、一小篮黄豆、一块咸肉、十只鸡蛋,笑眯眯对我话:“有办法了,阿拉就用自家屋里个全部存货,勒大年夜招待迭眼小囡。”我马上就表示赞成。

      第二天早浪向,老阿奶又带了一只布袋乘车子去南翔镇。伊勒出门前头告诉我,搿是为了去跟一位做生产队队长个亲眷商量,拾一眼公社社员收摘花菜、卷心菜以后留勒地里向个老梗子搭仔老叶片。当天黄昏辰光,老阿奶回到屋里,除脱背仔一只涨鼓鼓个布袋,还拎仔两只扁扁个小竹篓。我接过小竹篓一看,发觉里向有一样物事是用荷叶包起来嗰,心里有点好奇,就问:“搿是啥物事呀?”老阿奶笑嘻嘻回答:“搿是一样上海有名个点心。”又神秘兮兮讲:“侬大概还勿晓得伊是啥味道呢!”

      到仔大年夜,阿拉屋里铺开一只圆台面,上面摆仔七只碟子八只碗,还有八副长短勿一样个筷子,搿侪是六个小囡从自家屋里带过来嗰。阿拉搿点小八腊子本来就是弄堂里一道白相个小伙伴,搿歇辰光碰勒一道,真是交关扎劲。虽然台面浪个“冷盆”只有萝卜头、咸白菜、五香豆、炒螺蛳,但阿拉侪急勿可待,马上坐到圆台面旁边,嘻嘻哈哈,感觉过年味道特别浓。

      灶披间里,老阿奶一歇汏,一歇斩,一歇烧,忙得团团转。呒没多少辰光,一盘盘小菜陆陆续续端出来,有咸肉笃黄豆、霉干菜烧线粉、花菜炒咸肉、大葱炒鸡蛋,还有卷心菜汤咾啥。最后,老阿奶端出两只冒热气个大盘子,向大家介绍:“搿就是有一百多年历史个南翔小笼馒头,伊个特点是皮子蛮薄、汁水蛮多、馅子蛮大、外形蛮别致。亻那搿点小朋友大概侪呒没吃过,我也有几年呒没吃了,搿趟专门买仔两笼让大家享口福!”乃末,小八腊子侪来煞勿及伸出筷子。

      我搛起一只小笼馒头,发觉伊小巧玲珑赛过小宝塔,而且半透明;戳破脱皮子,蘸眼香醋搭仔姜丝,咬一口,一嘴巴汤汁邪气鲜。我灵机一动,建议大家用卷心菜汤代替汽水,一道“干杯”,祝愿新年吉祥如意,气氛一下子热烈起来,欢声笑语接连勿断……

      勒当年吃个物事老少个艰苦日脚里向,南翔小笼馒头让一顿特殊个年夜饭变得圆满。我也从此对迭样上海传统美食留下了深刻印象。



责任编辑:日升

本帖子中包含更多资源

您需要 登录 才可以下载或查看,没有账号?立即注册

×
您需要登录后才可以回帖 登录 | 立即注册

本版积分规则

Archiver|手机版|小黑屋|老辰光网   

GMT+8, 2024-6-17 14:41 , Processed in 0.026092 second(s), 22 queries .

Powered by Discuz! X3.5

© 2001-2023 Discuz! Team.

快速回复 返回顶部 返回列表