|
2022-09-18 来源：新民晚报网 作者：王志良
文/王志良
办公室小叶姑娘买来一盒赤豆棒冰，人手一根。让我想起小辰光吃赤豆棒冰个事体。
记得当时个夏天，到了下半天，弄堂里就时勿时会响起一种木板敲木箱个声音，而且每敲一记，就会听到一声吆喝，先是苏北话，后来又是上海话：“赤——豆——棒——冰，四分洋钿——买一根。”从远到近，拖仔长音。听辣阿拉搿点小朋友个耳朵里，就像一阵凉风吹进阿拉个心里向，天浪火辣辣个太阳也好像一下子变得温和起来。可惜我手里一分洋钿也呒没，只好用央求个眼神看姐姐，怂恿姐姐去对姆妈讲：“给阿拉姐弟俩各买一根赤豆棒冰吃吃。”姆妈听了，勿讲行，也勿讲勿行，一直到吆喝声越走越远，渐渐消失在小巷尽头……
等到我长大一点，二阿哥告诉我：埃歇辰光屋里向六个人侪靠阿爸一个月四十元工资生活，平时开销捉襟见肘，八分洋钿就是一天个小菜铜钿。
一个周六傍晚，我正坐在饭桌旁边做作业，刚刚下班回到屋里个阿爸，悄无声息走到我旁边，朝我手里塞了一只小纸包，我打开一看，里向有四枚一分硬币，我开心得跳起来，抱牢阿爸头颈，凑到伊耳朵旁边问：“爸爸，侬迭个钞票是啥地方来嗰？”阿爸看我开心个样子，笑而勿答。搿天夜里，我兴奋得睏勿着。
第二天一早起来，心里向就希望“赤豆棒冰”个吆喝快点响起来。吃过中饭，阿拉搿点弄堂里个小伙伴正辣一道白相，悠长个叫卖声如期而至，我迫勿及待冲出门，奔到卖棒冰个爷叔面前，“趾高气扬”递上四分钱，让卖棒冰个爷叔从箱子最底层拿一根冻得最硬个棒冰，迭种样子个棒冰勿容易融化。
撕掉包装纸，可以看到棒冰顶部有一层厚厚个赤豆，像一粒粒珍珠点缀辣冰面浪，晶莹剔透。辣其他小伙伴羡慕个眼神里，我拿赤豆棒冰放进嘴巴里轻轻舔吮，甜津津，冰冰凉，沁入心脾。
有意思个是，有辰光用三分洋钿可以买到断柄个棒冰。迭种棒冰，木柄只有一点点，冰块倒是完整嗰，价钿便宜25%，是勿是蛮合算？勿是老顾客，迭种便宜还碰勿到。
现在，各式各样棒冰应有尽有，小辰光吃个赤豆棒冰已经变成挥之勿去个回忆，因为伊是我个童年。
责任编辑：日升
| 
发表于 2022-10-2 12:56:54
