|
2022-08-14 来源：新民晚报网 作者：沈一珠
文并图/沈一珠
突然之间，老想吃油条了。马上，寻着一家叫“弄堂味道”的点心店，下单，两根油条、一块粢饭糕和一只咸大饼。送来再晓得，为啥迭家油条要卖5元一根：长度差勿多40厘米，顶宽处有八九厘米，是大模子油条。
由此大约模猜得出，迭家店里里外外把控局面的，肯定勿是上海弄堂里长大的，所以，味道也勿会太上海。道理讲出来蛮简单：拿书法作比方，假使眼门前迭根油条像胖墩墩福搭搭的颜体；葛末，从前阿拉上海人吃的油条基本浪就是筋瘦骨挺的瘦金体，或者柳体；从前上海人到弄堂口，买刚刚氽出来的油条，用一根筷子串好拿回屋里，剪成小段，酱油蘸蘸，一家人一道泡饭过过，勿是拿伊当饭吃的；眼门前迭两根油条，吃三分之一，炒三分之一，还有三分之一，冰箱里先囤一囤，再讲。
所以讲，吃迭桩事体，一个地方一种味道，搿种味道跟咸淡还勿全部是一回事体。
其实，买两根油条是因为今朝准备炒一碟丝瓜油条，大伏天里，丝瓜是顶清热消暑防燥降火的素小菜了。只勿过，日日吃，难免相看两生厌，所以，糟丝瓜、丝瓜炒蛋、丝瓜鲫鱼汤之余，今朝就丝瓜炒油条了，两个人的量，一根丝瓜，一根油条（今朝迭种油条一根嫌多，半根足够），再加两粒干贝，提鲜。总觉着，现在交关饭店里的菜，一勺子味精或者是半瓶浓汤宝倒下去，鲜味道常常显得简单粗暴；一碟菜里，隐隐约约带点自然鲜香的境界是顶顶好的。
丝瓜炒油条材料：
丝瓜一根，大油条半根（或传统普通油条一根），干贝几粒，葱白、油、盐、糖各少许。
做法：
丝瓜刨皮，切滚刀块，暴腌腌，开水焯一焯，冷水激透；干贝温开水泡软，沥干捏碎；油条剪成和丝瓜差勿多大小，油里煎到焦黄松脆，盛出来；葱白摆辣油镬里煸香，加丝瓜、干贝一道煸到丝瓜软，加稍许盐、糖翻匀，油条倒下去一道翻炒一分钟左右，就可以盛出来了。
责任编辑：日升
| 
发表于 2022-8-20 11:26:02
