|
2022-02-06 来源：新民晚报网 作者：沈一珠
每个礼拜四，阿拉总要聚辣好朋友海燕个地盘归雅集，一道听听音乐、画画图。顶顶开心个辰光是茶歇，吃吃喝喝，嘻嘻哈哈。
每次侪有交关好吃物事，迭趟是三只跟赤豆有关个面包：
一只是法式酒酿果仁面包。法式面包总有一层烘得干干透透个壳，本来不是太欢喜，偏偏里向个芯子是软软嗰，酸酸嗰，特别开胃勿讲，又夹裹了用朗姆酒浸得透透个果仁，其中一部分是软软糯糯，暖人心脾个赤豆。
第二只是赤豆包。顾名思义，夹仔赤豆馅个面包，外头还洒仔一层脆脆个扁桃仁片。吃起来既酥软又香脆。酥软嗰是赤豆，香脆嗰是桃仁。
第三只是大个赤豆枕头面包。赤豆一定是事先用蜂蜜和糖泡软蒸透嗰，烘焙过程中，赤豆汁顺仔面包里向个筋络渗透；所以面包切开，有邪气好看个大理石纹路。哎呀，真是好看、好吃、好闻个赤豆。
上海人吃个点心了，赤豆是常用嗰。譬如，月饼、馒头，还有过年必备个八宝饭里，做芯子个豆沙，就是赤豆做嗰；数九寒天里个腊八粥里，赤豆也老重要。因为，辣古人心里，赤豆是辟疫驱邪个物事。
北宋吕明远编过一本《岁时杂记》，记有这样的文字：“冬至日，以赤小豆煮粥，合门食之，可免疫气。”
今年暖冬，寒潮姗姗来迟，不过辣最后几天里，总算有点大冷天个味道了。来一碗陈皮赤豆莲子羹，暖心袪寒，养心血。
原料：赤豆、陈皮、莲子、冰糖各适量。
做法：赤豆、莲子提前浸泡半天备用；陈皮一块，泡软切成丝备用；锅子里加水适量，所有食材全部放进去，大火烧开，再小火慢炖一两个钟头；等莲子、赤豆酥烂，加冰糖适量，关火焖到冰糖完全化开就可以了。
责任编辑：日升
| 
发表于 2022-2-15 16:06:19
