2023-12-10 新民晚报网 作者：文/赵妃蓉
关于养生个话题是现在所有年龄段个人侪关心个事体，前一段辰光，年轻人自家到药房配酸梅汤，搿种事体也可以冲上热搜，现在天冷了，各种中药配方个茶饮也供不应求。实际浪向，养生迭桩事体老底子大家也是关心嗰，只勿过要专门拿出钞票买补药，勿是大多数家庭可以承受嗰。
比如我小辰光呒没电饭煲，外婆烧饭个辰光总归会守辣煤气灶旁边，水一烧开就拿锅盖揭开一点，插一根筷子进去，防止米汤潽出来，等锅子里个水少一点了，外婆就会用大调羹獙出表面个一层米油给我吃。长大了才晓得，搿层米油是很有营养嗰，外婆是用最朴素个方式给我补身体。可惜我小辰光勿懂，只晓得米油清香醇厚，每趟从外婆手里接过碗，凉一凉，就迫不及待吃光了，从来呒没问过外婆要不要也吃一口？
老底子一到冬天，只要阳光普照，外婆就一定会搬一只小矮凳到弄堂口晒太阳，顺便再晒晒被头，外婆讲晒得暖烘烘就勿会怕冷，勿怕冷么身体抵抗力就增加了呀。长大了才晓得晒太阳可以让身体合成维生素D。
小辰光经常看到隔壁邻居个女儿帮伊姆妈敲背，我觉得好白相，也会上去攥紧小拳头敲一敲，后来才晓得敲背个作用就和现在流行个捏脊老像嗰，多敲敲背可以让背部肌肉松解，让身体里个气血畅通，对身体有交关多好处。
对于养生迭桩事体，从古到今侪讲求身心同调，我觉得小辰光辣精神层面最好个养生就是邻里之间互相照顾，从落雨天帮邻居收衣裳到双职工子女放学以后到邻居屋里做功课……搿眼侪是生活里个细枝末节，但是辣当年就是连接人与人关系个纽带，是让人怀念个温情岁月。
责任编辑：日升
| 
发表于 2023-12-18 16:55:03
