|
2021-08-15来源：新民晚报网 作者：沈一珠
文并图/沈一珠
现在身边有交关人是勿欢喜烧饭嗰。
常常听到有人讲，现在好了，搬到新小区了，山青水绿风景如画勿去讲伊，顶顶好个是，小区里向食堂有好几只，零零星星还有几家面店、点心店；从此以后，过日脚便当交关，几只食堂调来吃吃，再呒没买汏烧个辛苦，多少好。
勿过，拨我讲起来，哪怕是简单点，烧一镬子白粥，再配一碟绍兴玫瑰乳腐，半只黄澄澄高邮咸蛋，或者再有几段黑酱瓜，搿才是有滋有味个家常日脚。
假使侬高兴，介绍一只我顶顶欢喜个蘑菇肉末粥拨侬，荤素有道，咸鲜香甜，可以试试看。
搿两天老热，趁早上还有点风凉辰光，淘米、斩肉、汏蘑菇，烧一镬子蘑菇肉末粥，鲜香滋美，是可以滋润一整天嗰。
蘑菇肉末蛋粥顶好是用砂锅，因为砂锅厚笃笃，可以锁牢温度，让每粒米均匀受热，笃出来个粥也就更加柔顺。假使呒没砂锅，就尽量选厚实一点个锅子。
材料：蘑菇若干，五花肉一小块，大米一小罐，鸡蛋一只，色拉油、盐、黄酒及葱花各少许。
做法：蘑菇汏清爽，切成薄片；蘑菇不算特别香，不过，伊口感比较细腻，又可以拿肉味道充分吸收；五花肉斩成末，用盐、黄酒轻轻掿一掿；大米淘清爽备用。砂锅里先刷一层油，肉末、蘑菇片煸一煸，再拿米摆下去一道翻一翻，最后倒适量水，大火烧开，中小火慢慢笃。笃到粥厚薄适中，关火前头，敲一只蛋进去，鸡蛋碰着热粥立刻就会结起来，用筷子搅散，等粥里结成黄黄白白个蛋丝，再撒一把葱花：葱花个香、蘑菇个鲜，还有肉和蛋个味道，扑面而来。轻轻交盛出来，就好吃了。
责任编辑：日升
| 
发表于 2021-8-25 13:22:07
