|
2021-07-04来源：新民晚报网 作者：沈一珠
文并图/沈一珠
朋友勿少，可惜侪到了中年、后中年年纪，见面少了。交关牵记，交关无奈，像上海前一抢个霏霏细雨，湿漉漉嗰，缠绵悱恻。
晓平住辣外国长远了，迭趟回来，几个朋友一道，约晓平辣黄金城道吃咖啡。讲讲从前，再平凡个人生，也总有闪闪发光个辰光。聊聊身体，一把年纪了，有人胆囊呒没了、有人气血勿足了、有人坐辣海想困，困下去反而眼瞪瞪一夜到天亮……
辣末生头，晓平讲，想吃绿豆棒冰。
哦哟，辣金光闪闪个黄金城道想吃一根绿豆棒冰，算勿算是中年人个心血来潮？
想起刚刚听咖啡馆里也有人问，想方便，啥地方有？店里小弟一边做咖啡，一边手指指外头：斜对面有家全家超市，旁边就是。
全家超市常见嗰，店里卖个物事还算接地气，可能有棒冰卖，所以立起来朝对面寻过去。走几十步路，全家呒没寻着，倒是看到一家写满日文个超市，犹豫仔一歇，还是进去了；想想，毕竟是开辣上海个店，作兴老板就是本地人，本地人大热天总归也是习惯吃根棒冰嗰，介热天，齐巧有呢？结果，兜仔一圈，勿巧，各式各样冰淇淋交关，就是呒没棒冰。
从店里出来，继续寻全家。
初夏天气，大太阳头里，汗汤汤渧，问一个爷叔，全家辣啥地方？爷叔木知木觉，倒是旁边两个坐辣海午休个饭司务，热热心心立起来：就辣前头，勿远了，喏，看见口伐，前头打弯角子浪，有只绿颜色棚棚个地方。
一鼓作气走过去，兴冲冲进门，寻着冰柜：还是呒没！问营业员小弟：阿有棒冰？小弟爽爽气气回答：呒没。
唉，立辣金光闪闪个步行道浪，心灰意冷之间，眼睛一亮，看到对面有一家清美超市，平常日脚买小菜个地方，精神一提，直冲进去：还好还好，从一堆棒冰当中翻出两根绿豆棒冰，再加两根盐水棒冰。扫一扫，5元。
看晓平举仔根绿豆棒冰，灰绿颜色一支，头浪三分之一轧满绿豆，开心得像回到小辰光。
可惜，侪是中年、中年后年纪了，身体勿灵光了，吃根棒冰要嗍两口，摆一歇。对面还有一位老先生，怕冷，吃只苹果，先问小弟讨杯热水，苹果摆辣杯子里向温一温，再一口一口吃。
岁月如风。要抓紧辰光开心。
责任编辑：日升
| 
发表于 2021-7-7 09:08:51
