|
2020年05月03日 来源：新民晚报 作者：陈金生
文/陈金生
战“疫”搭仔防控形势一日日向好，宅家度过“最长寒假”个学生仔要“背起书包上学堂”啦！
一提开学，当过老师又喜欢怀旧个我，好像又看到自家老早子开学辰光个几桩小事体，现在困梦头里也觉得蛮有趣嗰。
第一桩小事体是排座位。埃歇辰光我刚进小学读一年级，开学搿日，阿爸送我到教室门口就去上班了。我一看教室里，前几排位子浪向，阿爸姆妈坐得拍拍满。后来晓得伊拉侪是帮小囡“抢”前面个位子，还讲坐好仔就算正式位子了。我只好坐到倒数第二排。
正担心坐辣后头看勿清黑板，班主任孔老师走进教室。伊先请家长侪去外面等辣海，再叫阿拉学生仔到操场浪，从高到矮一字排开。孔老师眼睛一扫，拿高个学生调到队伍后面，矮个挪到前头。伊忽然发现有个学生呒没立直，走近细看，原来搿个学生为了坐到前排，脚馒头（膝盖）朝前挺出，人就显得矮了。真叫滑稽！孔老师拿搿个学生拉到队伍后头去，再带队伍回教室，让矮个先落坐前排。我长得比较矮，轮到坐第二排。现在回想起来，搿桩小事体，当时家长看辣眼睛里，肯定会有交关启发。
再讲另一桩小事体：包新书。
搿日天讲末讲是开学，其实呒没搿歇介个正规仪式。孔老师看大家侪坐定以后，就讲了一段闲话（相当于现在个开学致辞）。伊讲今朝开学了，大家是小学生了，上课应该哪能坐、哪能听讲、哪能举手发言……一歇歇，几个工友拎仔一捆捆新书走进来。孔老师解开绳子，拿出一小叠书放辣第一排课桌浪，叫学生拿脱一本，其余传到后座去。搿能介传到最后一排同学手里个书，多数是拨绳子捆得皱巴巴嗰。好几个同学举手要求调一本。孔老师走过去对伊拉讲：孔老师帮亻那准备了牛皮包书纸，回到屋里拿书摆辣床板浪向，困觉压辣上面，一夜天书就平整了。再拿包书纸一包，一本书照样漂漂亮亮。孔老师还讲，后日正式上课，我要看看啥人个书包得最挺括。
后日礼拜一，晨会课浪孔老师兜了一圈看大家包个书。伊举起一本绿颜色包书纸嗰、一本牛皮包书纸嗰，问：搿两本书包得好口伐？大家讲“真好看”“蛮赞嗰”。孔老师表扬了搿两个同学。又举起一本，是旧个挂历纸包嗰，包书纸浪有个大美女，大家看了侪咯咯咯笑起来。孔老师毫懆讲“覅笑覅笑”，再举起一本，有人“咦”了一声，原来包书纸是旧报纸。孔老师讲，搿本书封面封底四只角包得老挺括，又邪气朴素，一样可以保护书本，值得表扬。伊还带头拍起手来。现在想想，搿眼事体虽然小，但是里向个道理也是相当值得思考嗰。
开学辰光，还要做好其他个一眼小事体：比如由班主任老师带领小干部（小学除脱低年级外）进行大扫除、布置教室咾啥。想当年，教室布置个“标配”多数是：正面墙浪一面国旗，两边贴“好好学习天天向上”个标语（或校风、班风标语），教室四周墙上勿会空辣海，往往是英雄先烈个画像、名人名言、学习园地。乃末书法、图画好个同学可以一显身手。
到正式上课搿天，大家背仔新书包，坐辣自家个位子浪，看到既清爽又温馨个教室，侪觉得眼前一亮，纷纷评价“老赞嗰”“老嗲嗰”，之前卖力布置教室个同学听了覅忒焐心喔！
| 
发表于 2020-5-6 16:43:49
