|
2020-04-19 来源：新民晚报 作者：吴毓
文/吴毓
侪讲能辣灶披间里忙碌个男人最有魅力，迭个无疑是辣称赞阿拉上海男人。上海男人会做饭做家务嗰邪气多，辣搿段抗疫情期间，阿拉屋里个厨房间就被儿子和老公“占领”了，儿子天天动手做三顿饭，烧小菜个本事操练得像模像样，老公主要是辣厨房间里做馒头。
老公早饭一向欢喜吃馒头，我么夫唱妇随，也已经习惯吃馒头了，平常阿拉两家头个早饭侪是一碗米粥一只馒头。老早吃个馒头侪是从屋里附近一家馒头店买回来嗰，疫情期间馒头店勿开门，就网购了好几种速冻馒头。速冻馒头看上去雪雪白，馒头馅有肉有菜、有甜有咸、品种丰富，就是吃起来有点干巴巴，同馒头店当场蒸出来个馒头勿好比，吃口差了交关。等搿点速冻馒头吃光以后，老公决定自家做馒头。老公老家辣北方，北方人欢喜吃面食，据伊自家讲，做馒头个生活小辰光也是学过做过嗰。马上下单网购“包子馒头自发面粉”，还多买了一袋红豆沙，因为我欢喜吃豆沙馒头。
现在网购是真个便当，虽然疫情期间送货速度呒没平常快，但是快递小哥还是隔天就拿搿点物事送到小区门口。原料有了，老公说做就做，拿出砧板，围上了围裙，像模像样开始扌肉面粉。我勿会做馒头，只好汏汏蒸锅，做好准备工作，然后就立辣旁边看。老公一双手辣面团浪横揿竖捏，当中还辣面团里放了一点点糖，据说可以让面团发酵以后更加松软。大概捏了五分钟，又拿面团放到锅子里发酵。看伊做起来有条有理，滴水勿漏。
过了十几分钟，面团明显涨了起来，老公用手辣面团浪揿了揿，就讲发好了。伊拿面团捞出来，搓成长条再分成小段，拿一小段面团压成饼，当中放豆沙，通过捏边拿豆沙包起来，最后面皮收口个地方看起来就像一朵花。老公手势邪气熟练，就像变戏法一样。我看得有趣，也试了试，结果勉强做出一只“馅饼”，看来做馒头还是蛮有技术含量嗰。
馒头做好了，但是究竟味道哪能，还是要蒸出来吃过才晓得。我拿一只只馒头放到蒸锅里，摆得整整齐齐，盖上锅盖，蒸锅搁到煤气灶浪，老公讲要蒸廿分钟。听到蒸锅里个水咕嘟嘟响，又有一阵阵蒸汽从锅边冒出来，隐隐能闻到一阵香气，我有点心急，总想揭开锅盖看看，老公坚决阻止，伊讲馒头要一口气蒸好，勿然蒸出来个馒头会发僵。
终于等到出笼，看到里向个豆沙馒头饱满丰隆，皮子略黄，香气扑鼻，我随手夹出一个，慢慢咬一口，又松又软，迭种馒头才是早饭最好个搭配。
后来，老公又亲手做了肉馒头、菜馒头、刀切馒头、花卷馒头，花样翻新，越做越好吃。我拿阿拉自家屋里做个馒头拍照发到朋友圈了，赢得一片点赞，老公也赢得了一个“包子大王”个称号。等搿趟疫情过去，有勿少亲眷朋友想来尝尝“包子大王”个手艺呢。
| 
发表于 2020-4-22 17:26:58
