|
2022-08-14 来源：新民晚报网 作者：许德华
文/许德华
受疫情影响，我订个京戏全部退款，湖北英山游也泡汤了，难免有点不开心，还好有“南塘一舟”微信群。“南塘”是老年大学所在地个路名，所谓“活到老、学到老！”因为七个老朋友“三观”比较一致，所以搿次疫情封控，通过“南塘一舟”微信群茄山河让群友侪开心勿少。
像领头人四英姐，伊退休前辣医院做，晓得控制传染个重要性，所以伊对居住小区第一批被封呒没一句怪话，力所能及为社区防疫参谋，还帮忙联系医院配药。四英姐搭我侪听阅读写作课个网课。古人讲“秀才不出门，能知天下事”，网络时代勿是秀才也能做到。
再后来“足不出户”核酸、抗原测试侪来啦，天天测，难免有怨气，好在有“南塘一舟”聊天散心，消除影响。同时分享团购、囤菜、一日三餐个经验。譬如用一只优倍牛奶纸盒发绿豆芽；黄芽菜、包心菜水培比冰箱冷藏经济实惠。
蔬菜礼包里茄子勿少，按渊雅姐姐的办法做面托茄子，邪气好吃。弢弢亮出伊烘焙制作个蛋糕面包，引得大家馋涎欲滴，侪想解封后去买只烤箱学做点心。
“南塘一舟”里个群友侪是老年大学文史系嗰，免勿了交流各人写作。四英姐写伊当年辣长兴岛农场个经历；竹子山写仔交关当年双体客轮来往上海崇明之间个好白相事体；四卿写个诗朗诵最有文采，还晒出一份1971年10月发出个通知，安排伊去大兴安岭插队，还有当时个车票，保存完整，引起勿少同龄人感叹。埃歇辰光我还是一个小学生呢。
网浪向对网络聊天群个评价褒贬不一，我觉得关键是群友价值观相近最重要。“南塘一舟”就是迭能个群，乐惠嗰！
| 
发表于 2022-8-22 14:42:51
