|
2022-03-20 来源：新民晚报网 作者：沈一珠
文/沈一珠
搿段辰光，抗疫要紧，大家侪勿出门了，所以自家辣屋里烧烧吃吃，到也蛮乐惠。
想起前段辰光去过一家饭店，比较有意思个是，走进去就闻到一丝大红袍个味道，淡淡交，似有若无。问了领位个小姑娘，讲，阿拉不用化学品，只用岩茶做香熏。仔细一看，果然，房间角落里，贴墙根摆了一只盛满茶叶个盘子，下面用一只蜡烛灯烤着，蛮特别嗰。后来发现，这家店个服务员特别会介绍：安徽不打鸣个小公鸡，湖南樟树港个尖椒，天津沙窝个萝卜，金华两头乌火腿，哦，还有银鳕鱼丸子汤，是大厨特别推荐嗰，可以尝尝……
至于菜品么，的确精致，味道也妥帖暖心，算是一家吃好仔还会让人牵记个饭店。
翻翻冰箱，有几袋银鳕鱼，决定依样画葫芦，做银鳕鱼丸子汤。
勿算成功，毕竟，人家大厨十年磨一剑，功夫勿是白练嗰。总算胜在食材，银鳕鱼银白似雪，入口鲜香，就算是清蒸白煮，也一样鲜洁得清新脱俗。
食材：清鸡汤、菜心、枸杞一小把、鸡蛋一只、银鳕鱼一片；盐、木薯生粉、葱各少许。
做法：银鳕鱼汏清爽，水沥干，去皮去骨，斩成泥，加鸡蛋清、生粉、盐，顺一个方向搅拌五六分钟；加少许色拉油，继续顺同一个方向搅拌三五分钟。搅拌时间越长，做出来个丸子越有弹性。菜心若干棵，用开水烫熟，再用冷水过一过，备用；枸杞温水泡软，备用。
清鸡汤摆汤镬子里烧开，调好味道，改小火；用手拿银鳕鱼泥捏成丸子，轻轻交放到汤里，去除蛋清个蛋黄也可以一道摆进去，等银鳕鱼丸子浮出水面，再略煮一歇歇，盛进汤碗里。最后放菜心、枸杞，一碗赏心悦目个银鳕鱼丸子汤就成功了。
责任编辑：日升
| 
发表于 2022-3-25 14:08:16
