|
2022-03-13 来源：新民晚报网 作者：陈日旭
文/陈日旭
小辰光逢年过节，记忆最深个就是好吃物事交交关，譬如长桌浪向个糕团、水果；九品盘里个花生、瓜子、糖果，长辈讲起来搿眼物事侪是祭老祖宗嗰，实际浪最后侪进了阿拉搿点“小祖宗”个肚皮。介许多吃食里向，我顶欢喜糖年糕。
我是上世纪40年代初出生辣上海嗰，或许是因为祖籍无锡，无锡人欢喜吃甜食，我也欢喜吃甜食，阿拉一家门侪欢喜吃甜食，譬如，一到冷天，祖母蜜枣勿离嘴；离过年还有十来天，祖母就开始盘算定做糖年糕个事体。
记得当时阿拉住辣曹家渡，弄堂斜对面有一家糕团店，叫“仁丰斋”，老板也是无锡人。每到过年，祖母侪会拎着白糖、红糖、糯米粉，到糕团店定做糖年糕。曹家渡食品店里有现成个糖年糕可以买，勿过么，祖母觉得勿够甜，所以一定要亲自准备好原材料，再送到店里，请店家定做。临走前总归要反复叮嘱几句，大意无非是一个字，甜！
原料送到店里以后，过脱几天，还有一道“工序”需要祖母出面，就是辣年糕成形前先要试吃。每趟祖母侪会拉起我个手，讲：“走！阿囡，先去尝尝味道。”
糕团店工场间里侪是蒸汽，雾气腾腾，人面孔也看勿清爽。一个面点师傅捧出红白两团面粉，讲：“吃吃看，味道哪能？”我搭仔祖母一道试吃，师傅等祖母拍板。祖母嘴巴一瘪一瘪嚼了半天，吐出一句：“还可以多摆点糖。”伊老人家只会嫌勿甜，勿会嫌太甜。到了最后，祖母还要关照一句：“覅忘记多摆点桂花！”
试吃结束，回去路浪，我一路走一路啃“出外快”个年糕团，交关开心。再隔一天，做好个糖年糕送到屋里，有红白两个品种，香喷喷，热呼呼，表面有交关黄澄澄个桂花，一块块书本大小个糖年糕放满两只小木桶。搿点糖年糕足够阿拉一家门吃到正月十五。
过年吃糖年糕有几种吃法。
一是大年初一早浪，糖年糕切成小片，搭仔小糯米圆子一道，放辣锅子里，煮一锅甜甜个年糕小圆子，寓意“团团圆圆年年高”。
二是下半天三四点钟，用炉子烘几片糖年糕，当点心吃。具体做法勿复杂，先用菜刀从整块糖年糕浪切几片年糕片，拿镬子烧热勿放油，年糕片贴辣镬子浪烘热烘软。需要注意个是，火头勿能太旺，等年糕稍微有点焦了就可以了，吃口特别赞。
三是油煎糖年糕。相对来讲，三种吃法里，搿种味道最好，勿过当时食用油是凭票购买嗰，开油锅特别费油，姆妈平常是勿舍得嗰，只有新年里有亲眷来拜年走动，阿拉才有机会解解馋。
责任编辑：日升
| 
发表于 2022-3-18 15:21:36
